c உலக சினிமா-4
2016 டிசம்பர் மாத இதழ் “பல்சுவை காவியம்” வெளிவந்து மாபெரும் வரவேற்பைப் பெற்றுக் கொண்டிருக்கிறது.

உலக சினிமா-4

ஜப்பான்
நகிஸா ஓஷியாமாவின் இரண்டு படங்கள்  
ஹிரோஷிமா, நாகசாகி, உலக வரலாற்றின் திருப்புமுனை. கறுப்பு முனை.
அதுவரை உலகையே ஆளும் அதிகார வெறியின் உச்சத்திலிருந்த ஜப்பானுக்கு விழுந்த மரண அடி. ஜப்பனிய மக்களின் மனதில் ஆறா வடுவாகிப்போன காயம்.  
ஜப்பானின் அடுத்த தலைமுறை இதன் குற்றவுணர்ச்சியிலிருந்து விலக தத்துவங்களைத் தேடத் துவங்கியது.
இரண்டாம் உலகப் போருக்குப்  பின்  அதிகாரக் குவிப்பு சர்வாதிகாரம் பற்றி தீவிரமாகச் சிந்தித்த மேற்குலக சிந்தனையாளர்கள்  இறுக்கமான குடும்ப உறவுமுறைகளும்,  பெண்ணடிமையும், ஆணாதிக்கமும் தான் குடும்ப அதிகாரத்தின் மையம் என்பதை  கண்டறிந்தனர். இப்படிப் பல மையங்களின் ஒருங்கிணைப்பில்தான் சர்வாதிகாரம் கட்டமைக்கப்படுவதாகக் கண்டுபிடித்தனர்.
ஆகவே குடும்ப அமைப்பு உடைந்தால் தான் அதிகாரக் குவிப்பு கட்டுடைக்கப்படும்.
குடும்ப அமைப்புக்கு காரணமான பாலியல் இறுக்கம் தளரவேண்டும், ஒழுக்க விதிகள் கட்டுடைக்கப்படவேண்டும் என்றும் சிந்தனையாளர்கள் தீர்வாக  வரையறுத்தனர்.
ஜப்பானில் மாற்று சமூகத்தை கட்டமைக்க விரும்பிய புதிய தலைமுறை இந்த தத்துவத்தை அடிப்படையாகக் கொண்டு கலை இலக்கியங்களை உருவாக்கியது.
நகிஸா ஓஷியாமா அவர்களுள் ஒருவர்.
ஜப்பானிய இயக்குனர்களில் அகிராகுரசேவா, ஓசு,  கோபாயாஷிக்கு அடுத்தபடியாக  போற்றப்படும் அதி முக்கியமான இயக்குனர் நகிஸா ஓஷியாமா.
அதிர வைக்கும் மனித உண்மைகள்தான் ஓஷியாமா படங்களின் பலம்.
அவர் படங்கள் பேசிய அரசியல் உண்மைகள் ஜப்பானுக்குள் புதிய வெளிச்சத்தை உருவாக்கின.
ஓஷியாமாவின்  படங்களைக் கண்டு ஜப்பானே அதிர்ந்தது.  இறுகிக் கிடந்த மரபின் கதவுகள் உடைந்து நொறுங்கின.
அராசாங்கம் அவரது படங்களுக்குத் தடை விதித்தது.   
காரணம்  அவரது படத்திலிருந்த கட்டற்ற பாலுறவு காட்சிகள்.
ஒரு பக்கம்  அவரது முந்தைய தலைமுறை இயக்குனர்களான ஓசுவும், குரசேவாவும், கோபாயாஷியும் உலக அரங்கில் ஜப்பான் கலாச்சாரக் கொடியைப் பட்டொளி வீசிப் பறக்கவிட அதற்கு முற்றிலும் மாற்றாக  ஜப்பானின் இன்னொரு இருண்ட முகத்தை காண்பித்து புதியதலைமுறைக்கு சுய விசாரணையை கற்றுத் தந்து ஜப்பானில் மாற்று சமூகத்தை கட்டியமைத்ததில் ஓஷியாமாவின் பங்கு மகத்தானது.
மட்டுமல்லாமல் அவை மனித மனத்தின் இருண்மைகளையும்  பேசியதால், ஜப்பானையும் கடந்து உலக சினிமாவின் றெக்கைகளை விரித்துக்கொண்டன.
இத்தாலிய இயக்குனரும் பாலியல் உண்மையைப் படங்களின் வழியே சொன்னதற்காக பிற்பாடு மதவெறியர்களால் கொல்லப்பட்ட பசோலினி இவருக்கு முன்னோடியாக இருந்தார். அவர்  இத்தாலியின்  மதவாதத்தை அடித்து நொறுக்கியதுபோல இவர் ஜப்பானின் கலாச்சாரத்தை குறி வைத்து தாக்கியதுதான் இவரது சிறப்பு.  அதே சமயம் ஓஷியாமாவின் படங்கள் சிறந்த திரைக்கதை  மற்றும் வரலாற்றுப் பின்னணிகளுடன்,  கலாப்பூர்வ உருவாக்கத்துடன் அமைந்த காரணத்தால்  ஓஷியாமாவின் படங்கள் உலக சினிமாக்களாக கருதப்படுகின்றன.
மாரச் 31, 1932ஆம் ஆண்டு ஜப்பானில் பிறந்த ஓஷியாமா, கியோட்டோ யூனிவர்சிட்டியில் அரசியலை மையப் பாடமாகக்கொண்டு பட்டம் படித்தார். பின் திரைப்படத்துறைக்குள் நுழைந்து ஷொச்சிக்கு எனும் பட தயாரிப்பு நிறுவனத்தில் சேர்ந்து உதவி இயக்குனராக தொழிலைப் பயின்ற   ஓஷியாமா 27ஆம் வயதில்  எ டவுன் ஆப்  லவ் அண்ட் கோபே (A TOWN OF LOVE AND KOPE) என்ற முதல் படத்தை இயக்கினார்.
1968ல் வெளியான டெத் பை ஹேங்கிங் (DEATH BY HANGING)  படம்தான் அவரை உலக
சினிமா இயக்குனராக, ஜப்பானின் புதிய காற்றாக அறிமுகப்படுத்தியது.
கற்பழித்து கொலை செய்யும் ஒரு கொரிய குற்றவாளி இளைஞனுக்கு வழங்கப்படும் மரண தண்டனையைப் பற்றிப் பேசிய இப்படம் குற்றம் புரியும் மனித மனம் பற்றி அக்கறையுடன் பேசியது. ஒழுக்க மரபுகளுக்கு எதிரான கலக இயக்குனராக இப்படம் அவரை அடையாளம் காட்டியது.
தொடர்ந்து  வெளியான டைரி ஆப் எ ஷிஞ்சிக்கு தீஃப் (DIARY OF A SHINJUKU THIEF)  என்ற படம் பிரான்சின் புகழ்பெற்ற திருடரும் எழுத்தாளருமான  ஜெனேவின் தி தீஃப்ஸ் ஜேர்னலை (THE THIEFS JOURNAL)  அடிப்படையாகக் கொண்டு எடுக்கப்பட்டிருப்பதாக அறிவித்துக்கொண்டு வெளியானது.
இப்படியாக அதிகாரத்தை எதிர்க்கும், எதிர் அரசியல் படங்களின் வரிசையில் அவர் இயக்கிய மிக முக்கியத்துவம் வாய்ந்த இரு படங்கள் :
1. REALM OF SENSES ( 1976)
2. MERRY CHRISTMAS LAWRENCE (1983)
இதில் ரியல்ம் ஆஃப் சென்சஸ் (REALM OF SENSES) முழுக்க முழுக்க ஒரு காதலர்களின் பாலியல் உறவை மையப்படுத்தி உருவாக்கப்பட்ட திரைக்கதை. டோக்கியோ நகரின் ஒரு பாலியல் விடுதி. அந்த விடுதியில் பணிப்பெண்ணாக வேலைக்கு சேருபவள் சதா அபே. அவள் ஒரு பாலியல் பெண்ணாக இருந்தபோதிலும் தான் வெறும் பண்டமாகத் துய்க்கப்படுவதில் விருப்பமில்லாமல் அந்த விடுதியில் துப்புரவுப் பணிப் பெண்ணாக  வேலைக்குச் சேர்கிறாள். அந்த விடுதிக்கு வாடிக்கையாளராக வரும் பணக்காரனான கிச்சிக்கொ இஷிதா அங்கு வழக்கமாக தான் உறவுகொள்ளும் பெண் இல்லாத காரணத்தால் பணிப் பெண்ணான சதாவை தன் இச்சைக்கு ஆளாக்கிக்கொள்கிறான். அந்த உறவு அவர்களுக்குள் முடிவற்ற பந்தத்தை உருவாக்கிவிடுகிறது. இருவருமே ஒருவர்பால் ஒருவர் காந்தமாக ஈர்க்கப்பட்டு பிரிய முடியாத பித்த நிலைக்குள் விழுகின்றனர். ஒரு நிமிடம் கூட  காதலனை விட்டு பிரியமுடியாத அப்பெண் முழு நேரமும் அவனோடு உறவுகொள்வதில் தீவிரமாக ஈடுபடுகிறாள்.  இருவராலும் ஒருவரைவிட்டு இன்னொருவர் பிரிய முடியாத நிலை. இறுதியில் இந்த உளவியல்  பிரச்சனையிலிருந்து வெளிவர முடியாமல் தவிக்கிறாள். இறுதியாக அவள் அவன் உயிர்நாடியை வெட்டி கையில் வைத்துக் கொள்வதன் மூலமாக  இதிலிருந்து பூரணமாக விடுபடுகிறாள்.   
1936ல் டோக்கியோ நகரில் நடைபெற்ற உண்மைச் சம்பவமான இக்கதை அக்காலத்தில் பெரும் பரபரப்பை ஜப்பானில் உண்டாக்கியது. இவ்வழக்கில் பிற்பாடு நான்கு வருட தண்டனைக்குப் பின் அவளை கோர்ட் விடுதலை செய்தபோது ஒட்டு மொத்த ஜப்பானும் கொதித்து எழுந்தது.
ஏற்கனவே ஒழுக்க மீறல்களுக்குப் பெயர் போன ஓஷியாமா இந்தக் கதையை படமாக்கப் போகிறார் எனத் தெரிந்ததும் சென்சார் உஷாராகியது.
படபிடிப்பின்போதே இப்படத்தின்  பிலிம் சுருளைக் கைப்பற்றிய சென்ஸார் அதிகாரிகள் அடுத்தக் கட்டப் பணிகள் நடைபெறாமல் தடை விதிக்க, பிற்பாடு கப்பல் மூலம் நெகட்டிவ் பிரான்சுக்கு அனுப்பப்பட்டு அங்கேதான் முழு படத்தொகுப்பும் இதர வேலைகளும் நடந்து முழு படமும் தயாராகியது.
1976ல் நியூயார்க் பிலிம் ஃபெஸ்டிவலில் திரையிட்டவுடன் அமெரிக்க அரசு உடனடியாக இப்படத்தை இனி எங்கும் திரையிடக்கூடாது என உத்தரவிட்டது. அடுத்து ஜெர்மனியிலும் இன்னபிற நாடுகளிலும் இப்படத்துக்கு கடும் எதிர்ப்பு.
இப்படம் குறித்து ஜப்பானில் வழக்கு நடைபெற்றபோது நீதிபதி படத்தின் ஆபாச சித்தரிப்புகள் பற்றி என்ன சொல்கிறீர்கள் என கேட்க, ‘ஆபாசம் என்பது ஒன்றை மறைத்திருக்கும் பொருளை வெளிப்படுத்துவது. நான் எதையும் மறைக்கவேயில்லை, உண்மையைத்தான் சொல்லியிருக்கிறேன். அதை நீங்கள்தான் ஆபாசம் எனக் கூறுகிறீர்கள்’ என்றார்.
சினிமா சங்கங்கள் தவிர வேறு எந்தப் பொதுவெளியிலும் படத்தைத் திரையிட ஜப்பான் விதித்த தடை 1990ல் தான் முழுமையாக விலகியது.
1978ல் இப்படத்தின் தொடர்ச்சியாக எம்பயர் ஆஃப் பேசன்ஸ் (EMPIRE OF PASSIONS)  என்ற அடுத்த படத்தையும் இதே பாணியில் வெளியிட்டார். அந்தப் படத்தின் இரண்டு காதலர்கள் இதே போல கட்டற்ற உறவில் ஈடுபட்டு முடிவில் இருவருமே மரணத்தைத் தழுவிக்கொள்கிறார்கள். இந்தப் படம் 1978ஆம் ஆண்டு கான் விருது விழாவில் சிறந்த இயக்குனருக்கான விருதை இவருக்குப் பெற்றுத்தந்தது.
1983ல் இயக்கிய ‘மேரி கிறிஸ்துமஸ் லாரன்ஸ்’ வந்த பின்தான் ஓஷியாமா,  முழுமையான இயக்குனராக ஜப்பானில் அனைவராலும் ஏற்கப்பட்டார்.  அதன்பின்தான் அவரது முந்தைய படங்கள் அனைத்திற்கும் முக்கியத்துவம் கிடைக்கத் துவங்கியது.
புரிந்து கொள்ளப்படாத மனித மனத்தின் இருண்மையும், அதிகார வெறியும், வன்முறையும், முறை மீறிய பாலுறவும்தான் இதிலும் கதைக்களம்.
1942ல் இரண்டாம் உலகப் போரில்  இந்தோனிஷியாவின் ஜாவா காட்டுப் பகுதியில் ஒரு ராணுவ முகாமில் ஜப்பானிய ராணுவத்தை சேர்ந்த இரு ராணுவ அதிகாரிகளுக்கும், முகாமில் போர்க் கைதியாகப் பிடிபட்டிருக்கும் இரண்டு பிரிட்டிஷ் வீரர்களுக்குமான உறவுச் சிக்கல்களே கதை.
இதில் ஜப்பானிய உயர் அதிகாரி வேடத்தில் அப்படத்தின் இசையமைப்பளாரான ரியுச்சி சகமொடோ (RIYUCHI SAKAMODO)   நடித்தார். சிறந்த இசைக்கான அந்த ஆண்டின் ஙிளிதிஜிகி விருது அவருக்கு கிடைத்தது. அவருக்கு கீழே பணிபுரியும் இன்னொரு ராணுவ சார்ஜண்ட் பாத்திரத்தில் நடித்தவர் பிற்பாடு உலக சினிமாவின் சிறந்த இயக்குனர்களுள் ஒருவராக கருதப்பட்ட  டகாஷி கிடனோ (TAKASHI KITANO).
1996ல் இந்த இரு நடிகர்களையும் வைத்து டபூ (taboo)  என்ற படத்தை இயக்கி வெளியிட்டார்.
பக்கவாதம் தொடர்ந்து அவரை தாக்கியதன் காரணமாக இயக்குவதை நிறுத்திக்கொண்டு தீவிரமாக எழுத்துப் பணியில் இயங்கினார்.
ஆங்கிலத்திலிருந்து ஜப்பானிய மொழிக்குச் சில நூல்களை மொழிபெயர்த்தார். அவற்றில் ஒன்று மென் ஆர் ஃபிரம் மார்ஸ், வுமன் ஆர் ஃபிரம் வெனஸ் (MEN ARE FROM MARS, WOMEN ARE FROM VENUS).
2013ஆம் ஆண்டு 80ஆம் வயதில் நிமோனியா தாக்கி இறந்தார்.
2013ஆம் ஆண்டு சான் செபாஸ்டியன் பிலிம் பெஸ்டிவல் அவரது ஒட்டு மொத்தப் படங்களையும் திரையிட்டு அவருக்குச் சிறப்பைத் தேடித்தந்தது.

 
நிகழ்வுகள்

184, வைகை காலனி (கிழக்கு),
அண்ணா நகர்,
மதுரை-625 020.

பின் தொடரலாம்

தொலைபேசி : +91-44-43589876,
மின்னஞ்சல் : info@kaviyam.in
இணையதளம் : www.kaviyam.in

சமூக வலை தளம்  :

\

© 2012 kaviyam All Rights Reserved.Powered by Zeal Soft Technology Solutions